|
| [講不出聲] 好耐無打xanga啦,因為呢個月一來多野做,二來無乜心機打,所以無乜點打,講番呢個月,因為準備考試,所以不停咁背野,結果4科都俾我pass哂,好野,幾驚唔合格,一睇到合格成個人鬆哂,希望下一個學期果5科都能夠pass埋啦!! 考完試就班FD去食飯,同埋去唱K,就係呢度都用左差唔多70蚊,不過又唔係成日去,所以無乜所謂,放假呢2個星期都係拾下房,打下機,睇番D電視劇,加上我呢度住到年尾就要搬,所以都要搵定地方住,暫時希望近番間學校,有得上網,價錢唔貴就OK架啦!! 講開電視劇集,最近睇左尖子攻略,又1個星期煲哂成套溏心2,宜家又追緊四大名捕同與敵同行等等,所以放假日子都唔算好悶!!同埋琴日又DL埋三國志11黎玩,不過玩得兩玩就唔想玩,原因係唔鍾意行棋式就玩... 最後呢,我終於買左ipod nano,價錢算平,當然HK價錢就平過呢度啦,不過唔理啦,起碼等左好耐終於買到,遲下叫亞爸寄個保護貼黎,因為呢度買好貴!! 今年唔會返香港架啦,所以呢,係澳洲過炎熱聖誕,希望到時搵到part-time黎做啦,宜家?暫時唔搵住,唔想返工返學搞到兩頭唔到岸!! | | |
| [逼得太緊] 好耐無打xanga啦,因為自己懶,同埋又多野做,所以無乜點打囉!!最近都係趕住做幾份report,做到死死下,今個星期3要交份marketing,星期5又要present,下星期2就要交IBIS,9月22號就要考試,所以呢段日子不停咁寫notes方便溫書,但係由於經常咁不停咁做,有陣時做到人都緊哂,好難去放鬆自己,一旦放鬆自己又驚成個人無哂動力去溫書,所以焗住自己繼續溫書!! 近排諗番起前1,2年既事情,發現原來有段日子比起宜家更加開心,無錯,宜家雖然自己一個人住,返學又彈性,無人理你,但係好容易變左做獨居人士,難聽D講句,死左無人知發生乜野事,仲記住上年果陣時,一開學同班同學係自修室話大話啤,果陣時好鬼開心,雖然一方面我地個個都數住日子,經常話下星期先溫啦,仲未遲,但係好快又唔記得,呢段日子好鬼正!!宜家都想搵D人玩大話啤,但係已經唔同感覺,即使玩起上黎都唔會係果種既感覺!! 1年時間真係過得好快,宜家就9月啦,3個月後就2009年,諗番今年真係勁多風波,雖然我成日認為2008年係唔錯既一年,但係宜家回顧番,係唔係真係咁好呢??我有開心?宜家我只能講係不過不失,好平淡,可能長時間過得太平淡,令到自己不安穩,總係想搵D野做先滿足,但呢一刻我仲未知想搵乜野黎做,可能係買野,可能係又再搵工,可能係瘋狂掃貨等等!! 發覺自己真係比較3分鐘熱度既人,打機一旦太過沉迷,跟住既日子就對打機失去興趣,要冷卻一段日子先至有興趣玩番!!打工都係一樣,不過宜家都唔著急搵工先,畢竟顧掂考試先,考完先再搵,希望搵到份工而做到至少2,3個月啦,因為始終好想儲到錢去旅行!! | | |
| [遇到瓶頸] 好耐無打日記,因為最近都幾多野忙,分別呢幾個星期都有TEST,所以時間都放上溫書果度,同埋同時間又有2個report要做,由於D組員有D算做野,有D就不知所謂,所以搞到我好頭痛,經常要提醒自己要做,其中有1份我自己果part就做完,但係人地果part就仲未做完,唉,都唔知點算好,睇黎9死1生... 奧運又開始,搞到我日日都睇電視,澳洲呢度梗係播澳洲隊既賽事,令到我想睇香港隊/中國隊要上網睇,但係成日都好窒,搞到無心機睇...但點都好,有得睇總好過無得睇!!至於英超,最近又開番,我梗係睇啦,星期6睇到5點先訓,琴日就睇到3點先訓,好彩今日返學返9點半,都無咁傷!! 最近又再迷上跑同CS,我諗又再步入番玩石器私服果陣時既心態!! | | |
| [望梅會止渴?] 呢個星期有幾件驚喜既事情,分別係兩科測驗都有唔錯既成績,同埋英文測驗都唔太難,應該合格,不過黎緊呢個星期就有2個會計既測驗,希望自己發揮得唔錯啦!!當初因為返工好驚果2個測試成績會唔好,但最後無被影響,真係好彩!!不過呢,我都決定唔返工,以後時間多番,可以分配好時間做每一件事!! 另一樣事情就係我琴日終於唔返工,我採取玩野戰術,就係唔返工,唔開手提,費事佢打黎又問候我,等遲下佢地再打黎我可以話我唔做跟住cut線,費事同佢地講咁多野!!不過宜家仲未搵到第2份,睇黎又要等一排先搵到,不過最緊要係搵到份自己做得開心既工,如果唔係,搵幾多都係假,到最後好似出賣自己既靈魂就得不償失啦!! 最後一件事係今年生日真係比之前4年仲平靜 可能我無同呢度D朋友講,不過無理由同人地講我今日生日呀,一D驚喜都無,所以索性唔講,不過自己都買左個蛋糕黎食,朱古力蛋糕,起碼有排食!!今年生日過得咁平靜又唔錯既,反正自己總係俾人認為係遺忘的一群,可有可無,已經習慣了 8月又黎,好快又中秋節之類,希望今年買番個月餅食下先,因為好耐無食,口痕想食番!!同埋希望朋友們影多D動漫節既相,不論模型又好,女又好,風景又好,總知可以俾我感受下都唔錯!! | | |
| [決定唔做] 經過連續2晚既返工,我決定唔做,因為入面氣氛又唔好,成日亂點我做野,跟住又俾另一個經理鬧番我轉頭,仲要俾個老闆娘鬧我,直情硬食一隻死貓!!加上放工之後交通唔方便,星期6,日時間無哂之餘,影響自己D讀書成績,最終決定唔做!! 首先,前日只係做夜晚,雖然係咁,但係一做夜市就好忙,做慢少少或者唔記得D步驟,即刻俾人鬧,不過俾人鬧既次數已經算少左,因為老闆巡視大家,又訓話我地同班經理,令到D經理都無時間鬧新人,同樣地,我負責做既野係將D碗碟放番原位,同埋洗杯,總知類似雜工既部份,到放工果陣,由於趕火車,宵夜都無食,人工又無俾我,果陣時其實諗住拎埋人工就索性唔做,點知拎唔到,唯有死死氣返埋星期日!! 一返到屋企即刻沖涼訓覺,因為第2日又要早起身,其實返呢份工,搞到自己把聲有問題同埋手,腳D肌肉部份好痺,可能真係訓得唔好,同埋長時間企係度!! 到左星期日返工,由於返全日,好早起身做好準備,因為唔想遲到,聽果個老闆琴日講,如果遲到5分鐘,就欠佢1個鐘頭工作時間,結果正式返工果陣,我負責又係類似雜工之類,仲要幫手收枱之類,不過成日犯錯,搞到俾人鬧之餘,仲拖慢進度,搞到唔好意思,同埋有次沖茶唔小心燙傷隻手,兩隻手指起哂水咆,痛到跟本做唔到野,但只好死頂!!都唔知點解D鬼佬咁鍾意飲茶,黎極都咁多人,做到搞到無心機做,腦入面不停諗幾時俾番D人工我,俾完既話我就唔做!! 結果3點到落場,分左D貼士,我其實唔多,因為我無乜點Ser個D客人,之後中間休息期間同另一個新人傾下計,佢又係岩岩先返工,好多野都係未熟,到左4點9左右就食飯,今次食飯唔同前幾次,我不停咁食,食野就食,因為我知道我唔會再返呢份工,我要拎盡哂所有甜頭先走人!!結果隻薑蔥雞俾我食左好多!! 到晚市果陣,同樣做幾檔,包括執好碗碟,洗杯,倒垃圾,甚至走去分店拎野返黎,仲要唔1次,起碼有3,4次,大約做到11點左右就派人工,我偷偷地入左廁所開黎睇,發覺派埋星期6晚果D,正,基本上我隨時唔做都得,到左11點半,理論上我可以走得,但係我想食埋宵夜先走,結果食宵夜,仲要係生炒牛肉飯,不停狂食,食到11點50分先走人,當然過左11點半就無火車,唯有坐電車,坐一架係唔多接近我屋企附近既電車!! 坐上去果陣時,由於唔熟呢條路線,搞到過左龍都唔知,結果司機叫我唔好落車,因為一陣架車會開番轉頭,佢好好人叫我落車,當我落車果陣,見到路牌寫個街道名,係就係我附近果條街道名,點解唔似樣,原來果條街勁長,我要行成25分鐘就去到我平時去開超市既地方,差唔多成30分鐘就行返到屋企,返到去,隻腳攰到係唔屬於自己,不過點都好,我單方面正式唔做呢份工,睇下1,2日後打個電話俾佢地話唔做或者索性失蹤又好,總知佢地同我已經再無關係!! 我宜家先發覺,原來時間比金錢重要,自己快樂俾為左錢而返工更重要!! | | |
|
